لماذا مفروض تستخدم (تورينت سيرفر) منفصل ؟
السؤال دا طرح احد مجموعات سوشيال ميديا
في بوست بتاع تورينت وطلب انو نعمل بوست منفصل عشان النس تستفيد من المعلومات
كتير بتسمع بعض الشباب بيستخدمو برامج تورينت في مختلف انظمة التشغيل لينكس ماك ويندوز وحتي اندرويد طيب التورينت هو زاتو شنو ؟؟؟
التورينت بي بساطة هي خدمة مشاركة ملفات , يعني انت بتنزل ملفات من اجهزة المستخدمين وهم كمان بينزلو منك الموجود عندك , بتستخدم في معظم الاوقات لتحميل الفلام والبرامج الكبيره وغيرو
لكن في الحقيقة معظم استخدام التورينت بيكون لتحميل ملفات عليها حقوق ملكية فكرية مثلا تحميل فلم او نسخة مكركة من ويندوز او برنامج مع الكراك او كورس تعليمي مدفوع ,
كل الحاجات دي الناس بتنزلا مجاني ليه لانو التحميل بتاع البرامج دي مباشره من كمبيوترات بتاعت ناس عاديين زيك
يعني ما موقع تحميل مثلا لانو المواقع ممكن تتقفل بس سبب حقوق النسخ والملكة الفكرية لانو في النهاية المسجلين بتاعين الدومينات ممكن يقدرو يقفلو ليك الدومين او كمان شركة الاستضافة ممكن تقفل ليك السيرفر خصوصا لو كانت في امريكا لانو بتحكمها قوانين حماية الملكة الفكرية بواسطة الحكومة الامريكية
لكن الحكومة الامريكية او غيرا ما عندهم سيطره علي اجهزة الناس يعني انا لو موصل كمبيوتري في النت و اديتك (الاي بي) بتاعي انت ممكن تقدر تحمل فايلات عادي من جهازي (في بعض الحكومات بتراقب الاتصال وبتقدر تعرف انت بتنزل شنو عشان كدا افضل شي تستخدم _في بي ان_ مع استخدامك للتورينت)
الصوره دي بتوضح الفرق بين التحميل من مراكز تحميل موحدة و التحميل المباشر من اجهزة الناس - بيسموها (بير تو بير)
طيب التورينت زي ما عندو محاسن عندو مساوى نذكر منها:
1- بيفتح بورتات في كمبيوترك (وفي الغالب ممكن تكون عشوائية لكن انت ممكن تحدد ليهو بورت محدد يشتغل بيهو) دي بتخلي جازك قابل للاختراق
2- الفيروسات , كتير من الملفات بتكون مفيرسه وخصوصا البرامج المكركه لكن دي مقدور عليها , نزل انتي فايروس كويس بتكون ما عندك المشكلة دي
Three- اذا شغال بي لابتوب مرات بيكون عندك ملفات كبيره ودي بتاخد وكت عشان تنزل ودي بتعمل مشكلة في بطارية اللابتوب بي سبب الاستخدام الكتير والتوصيل في الشاحن وكمان مرات بتسيب الجاز في محل انت موصلو في النت و ما تقدر تتطلع بيهو اي مكان تاني ودي واحدة من اكتر المشاكل اللي كانت تاعباني انو اطلع واخلي الابتوب في البيت موصل في الشبكة
Four- اذا ما حددت حد لي سرعة التحميل و الرفع ممكن الحاجة دي تاثر علي سرعه الانترنت عندك , يعني لو كانت عندك ملفات تورينت كتيره وما موقفها ف ح تاخد الباندويث بتاع الابلود بتاع الكونشن بتاعك و تحس انو في بطء في تصفح الانترنت
طيب كيف بنحمل برامج عن طريق التورنت , اولا بتدخل مواقع كبيره تنزل منها ملف التورينت
Thepiratebay dot org
وغيرو كتير بس دا اشهر موقع لكن في موقع تانية مخصصه في البرامج الهندسية وغيرو المهم شوف في قوقل العايزو وجيب ملف التورينت
تانيا لازم يكون عندك برنامج تورينت كلاين زي
UTorrent for home windows Mac Linux and Android
Transmission for linux
كل البرامج دي ممتازة جدا و مجانية ماعدا الاول فيهو اعلانات كتير لو ما عايز اعلانات ممكن تشتري نسخة خالية من الاعلانات او تنزل نسخة مكركة
الاول ساهل جد لكن انا اليوم ح اتكلم عن برنامج ترانسمشين التاني ليه؟ لانو فيهو ميزة يشتغل عن طريق (واجهة ويب) وممكن يشتغل في ديسكتوب زي باقي البرامج طبعا هو برنامج مفتوح المصدر ومجاني 100% اتعمل اساسا عشان لينكس لكن بيشتغل في انظمة تاني برضو
نرجع للمشكلة رقم 3 زمان كنت بعاني منها شديد ف قررت انو اعمل جهاز مخصوص للتورينت (تورينت سيرفر) يكون شغال 24 ساعه, انا في انا مافي هو يكون شغال بينزل او حاجة جربت اشتريت (في بي اس) سيرفر (اونلاين)بي خمسة دولار للشهر و سطبت كل برامج التوريت عليه و بعدين كنت بسحب الفايلات التم تحميلا عن طريق برنامج (اف تي بي) لكن بعديها ربنا فتحا عليا وكنت قاعد في دوله الانترنت فيها سريع
كانت سرعة النت عندي 200 ميغا في الثانية ف اشتريت كمبيوتر صغير قدر بطاقة الصراف الالي في الطول و العرض , اسمو (راسبيري باي) ونزلت فيهو نظام تشغيل لينكس وسطبت فيهو برنامج تراتسمشن للتورنت
طبعا الكمبيوتر ممكن تشغلو بي شاشة وكيبورد وماوس وومكن تشغلو ممن غير دا كلو , توصل ليهو شاحن تلفون عادي و كيبل شبكة او تربطو بالوايفاي فقط يعني وصلتين بس
كنت موصلو بالراوتر بتاع النت وبقدر اصل ليهو واتحكم فيهو من لابتبوبي عن طريق الشبكة اقدر ادخل علي (الاي بي) عن طريق المتصفح بتاع النت العادي ف بتظهر لي واجهة فيها لوحة تحكم خاصة بالتورينت اضيف فيها او امسح او اشوف ال تم تنزيلو شنو وبعدين اسحب الملفات عن طريق الشبكة بين لابتوبي و (الراسبيري باي)
الفكره انو (الراسبيري باي) بيكون شغال 24 ساعه وما بيستهلك كهرباء وما عايز شاشة ولا كيبورد و حجمو صغير يعني ممكن تخليهو جنب الراوتر زي ما ظاهر ليكم في الصور وحتي كمان بياخد كهرباء من فتحة (اليو اس بي) بتاعت الراوتر يعني ما محتاج شاحن موصل في الحيطة
تانيا من ناحية امان اللينكس اعلي من الويندوز و حتي لو اخترقو زول تاني ف هو اصلا جهاز ثانوي يعني ما فيهو حاجة مهمة يقولو عليها , احسن من يخترق لابتوبك مباشر (لكن بيني وبينك لو زول قدر يخترق نظام لينكس حديث في شبكتك اظن ما صعب عليهو يصل لي لابتوبك) لكن في كل الاحوال نسبة اختراقك اقل من الاول
تالتا الراسبيري دا ممكن تستفيد منو في حاجات تانية كتير لانو 24 ساعه مربوط بالنت - انا عموما منزل فيهو (ويب سيرفر) و (ماي اسكيو ال سيرفر) وبجرب فيهو شغل (الكونتينر) و (الدوكر) يعني من الاخر انت بيكون عندك بيئة تجرب فيها تجاربك بدل تقعد كل مره تجرب في لابتوبك و تعمل لابتوبك فار تجارب وكل شوية تفرمط والامور ديك
بالنسبة لي سوال مشكلة شريحة زين مع التورينت - هي مسالة استخدام بس يعني مجرد ما تحصل حد الاستخدام العادل زين تعمل حظر لي برتكولات التورنت ف بتحتاج لي (في بي ان)
الصور تحت بتوضح كيف تدخل ع التورينت سيرفر عن طريق كتابة (الاي بي) الخاص بالسيرفر والبورت الخاصة بي خدمة (ترانسمشين) وفي صورة تانية بتوضح الدخول علي الملفات اللتي تم تحميلا , الدخول بيتم عن طريق مشاركة الشبكة مع اللابتوب , و صوره تانية بتوضح توصيل (الراسبيري باي) مع الراوتر وصوره غيرها بتوضح طريقة تحميل التورينت مقابل طريقة التحميل العادية
